Vnà d’eira ün lö da passagi sülla ruta sur la Fuorcla Maisas (vers Samignun) e sur il Cuolmen d’Fenga (vers Paznaun / Montafun ed inavant in direcziun dal Lai da Constanza). La baselgia vaiva dimena eir üna funcziun dad etappa avant co traversar ils pass. Ella deriva dad avant la refuormaziun ed ha surgni sia fuorma i’l 16avel tschientiner.
I ’s aintra illa baselgia da la vart süd tras il portun ed ün piertanet. La baslegia as cumpuona dad ün’unica nav per la raspada e dad ün cor poligonal marcantamaing adozà e ligermaing stort. La nav es cuvernada cun ün vout ad arch cun graistas applichadas. L’empora da lain da la vart vest deriva dal 1727. La chonzla culla s-chaffina da la Bibla, tipica per l’Engiadina Bassa, suot l’arch da triumf, deriva dal 1728. Ellas fuorman ün’unità, sun lavuradas in stil baroc e muossan pittüras floralas ed intagls.
Il mür vers süd es fittà cun üna pittura mürala (16avel tschientiner) cun Maria e l’uffantin Gesu, flancada dals duos martirs Sebastian (a dretta) e Bartolomeus (a schnestra).