Strada posseda pür daspö il 1750 ün’aigna baselgia. Avant giaivan ils abitants a predgia a San Niclà o sü Tschlin. Cull’importanza creschainta dal cumün es però nat il giavüsch d’avair ün’aigna baselgia.
Illa baselgia da stil baroc s’acceda sü d’üna s-chala signurila. Il modest portal as rechatta illa fatschada dal clucher. Sur quel s’adozan duos plans dal clucher e’l plan dals sains cun duos sains.
Sur la nav as stenda ün simpel tschêlsura a vout. Il cor es separà be ligermaing da la nav. Il spazi dal cor poligonal vain determinà a schnestra da la chonzla (19avel tschientiner). Suot la fanestra dal cor as rechatta l’orgel cun 3 registers. Il center dal cor fuorma la maisa dal Segner, la maisa, vi da la quala i vain celebrà il battaisem e la Soncha Tschaina.
