Baseglia San Plasch a Tschlin

La baselgia da Tschlin es tschantada sün üna collina süsom cumün. Ella es gnüda fabrichada intuorn il 1515 in stil gotic tardiv, probabelmaing da Bernard da Pusch­lav. Il clucher da stil romanic deriva da l’edifizi anteriur. El posseda be ün sainet. La sunasoncha da Tschlin as rechatta aint il clucher sper il sunteri. Quel clucher es gnü eret dal 1768 e toccaiva pro la baselgia da San Jon, devastada dal fö dal 1856. 

La modesta fatschada principala vain structurada d’üna fanestra raduonda cun filigrana gotica e d’üna fanestra cun fuorma da rombus. Sur l’interiur ad üna nav as stenda ün vout cun costas a rait. Quel cuntinuescha eir aint il cor da ladezza redütta, spostà vers süd.

Las pittüras derivan dals ons tanter il 1515 e’l 1545, cur cha Tschlin ha acceptà la refuormaziun e cha l’equipamaint e decoraziun sun gnüts per part allontanats resp. cuvernats cun chaltschina. L’equipamaint odiern consista d’üna s-chaffa richamaing ornada illa part principala dal cor e da la chonzla culla s-chaffina da la Bibla (18avel tschientiner tampriv). Da la vart vest es gnüda integrada dal 1668 ün’empora chi ha donnagià fermamaing il ciclus da las pittüras müralas da la vart nord. 

A chaschun da la renovaziun dal 1955 s’haja darcheu portà a glüm differents affrais-chs. Sper il ciclus da S. Plasch (Blasius) as rechatta al nord da l’arch dal cor üna curuna d’altar pittürada. La predella muossa il fazöl da Veronica, il purtret d’altar rapreschainta il S. Sebastian ed ün sonch ovais-ch.
Sülla curuna da l’altar survart as vezza ün sonch cun bastun e cudesch. L’altar svess es gnü allontanà dürant la refuormaziun. 

Aint il cor es rapreschantà il S. Plasch in üna cuntrada stilisada; sura as vezza ün hom cun mans dozats (ev. l’hom da las doluors). Vi dal mür vers süd rapreschainta ün purtret votiv l’elevaziun da Maria Magdalena. Illa part suot vezzaina ils duos donatuors inschnuogliats; sur els vain Maria Magdalena, sco pechadra exemplarica, adozada dad anguels al servezzan divin celestial, sco expressiun da la grazcha divina. Sur quista scena appara il Bap in tschêl chi dà la benedicziun.