Als 1. avuost cumainza Romana Giossi seis on sco vicara pro nus illa Corporaziun evangelica Valsot.
Ella ha stübgià teologia a Basilea, Turich e Münster (in Germania) e fa uossa la scolaziun pratica chi tilla maina pro l’ordinaziun e la pussibiltà da surtour svess üna pravenda. Sper ils cuors ch’ella frequainta cun tschels vicars, fa’la pro nus experienzas praticas in tuot ils chomps da lavur d’üna pravenda: cults divins, instrucziun, chüra d’ormas e progets. Ella s’allegra sün üna pruna buns inscunters quia pro nus in Engiadina Bassa e da scuvrir la lavur sco futura ravarendessa.
Romana Giossi cugnuoscha fingià nossa regiun, illa quala ella ha passantà duos stats. Ella es creschüda sü a Pratteln sper Basilea sco descendenta d’üna famiglia da Tujetsch. Uschè è’la eir socialisada illa baselgia catolica, ma ha stübgià teologia refuormada e catolica ed ha decis da dvantar vicara refuormada.
Sia lingua materna es il tudais-ch svizzer ed ella s’allegra da far cugnuschentscha cul vallader dürant seis on da vicariat. In seis temp liber va Romana gugent a spass, fa culs spaits, legia cudeschs ed es chantadura in cors.
Nus ans allegrain da far Tia cugnuschentscha e da’T inscuntrar in nossa raspada!
/il consistori e la pravenda evangelica Valsot