La baselgia 'Bruder Klaus' aint a Samignun es sainz' oter la baselgia la plü moderna, illa quala cha nossa raspada celebrescha cults divins. E güst amo alch tilla disferenzchescha da nossas baselgias illa part engiadinaisa da nossa corporaziun: I vain predgià per tudais-ch.
Daspö ils ons 70 dal 16avel tschientiner es Samignun stat paritetic – voul dir chi staivan cristians refuormats e catolics insembel i'l medem cumün. Ed uschè celebraina amo hoz la predgia refuormada e la messa catolica illa listessa baselgia.
Fin il 19avel tschientiner daiva üna corporaziun evangelica independenta aint a Samignun. Ma sco cha'ls refuormats sun gnüts almain, es la comunità finalmaing gnüda scholta e'l ravarenda da Tschlin d'eira da quinderinavant respunsabel per la pastoraziun dals refuormats aint a Samignun. Hoz ha lö per regla ün cult divin al mais illa baselgia 'Bruder Klaus'.