Baselgia Sonch Flurin a Ramosch

La baselgia Sonch Flurin da Ramosch es gnüda fa­brichada dal 1522. Bernard da Puschlav till’ha con­struida da fuond sü, davo cha la baselgia d’eira gnüda devastada dal 1499 dürant la Guerra Svabaisa. L’edifizi da stil gotic tardiv es d’üna grondezza surprendenta. El consista d’ün volüm cubic e d’ün cor da ladezza redütta, cuvernats d’ün tet a culmaina ininterruotta. Il clucher es attachà a la baselgia da la vart süd. Vi dal clucher vezzaina sper ils quadrants da l’ura ils simbols dals Evangelists e vers biblics (chaplina dal 1926). 

L’interiur as cumpuona dad ün’unica nav e d’ün cor da ladezza redütta, per duos s-chalins plü ot co la nav. Ils craps clav dal vout da stil gotic tardiv sun ornats cun rösas cun quatter föglias, cun ün purtret dal sonch Flurin, cun üna rapreschantaziun da Cristus sco eir cul capricorn da la Lia da la Chadè. 

Las differentas sorts da bancs reflettan l’uorden istoric da la società: per l’üna ün pêr pacs bancs da famiglia dal 17 e 18avel tschientiner, e per l’otra il grond numer da bancs per la raspada. Da la vart süd as rechattan ils bancs pels homens, da la vart nord quels pellas duonnas maridadas. Ils bancs traversals sun per las mattas e las duonnas nubilas ed ils bancs da la vart süd chi guardan vers la raspada, sun pels mats. 

Süll’empora s’adoza l’orgel construi dad Andreas Mauracher. Quai es ün instrumaint ad ün manual, cun pedal scurzni e cun 14 registers. El as rechatta in quel lö daspö il 1800. La part la plü veglia da l’orgel deriva d’ün instrumaint dal 1680. Da la vart as rechattan ils boffets chi funcziunan amo adüna. 

La chonzla deriva dal 1522. Dal 1706 es ella gnüda cumplettada cun ün tettin chi ha üna funcziun acustica. Ün’inscripziun admonischa: ‚Qui non ascendit cum tremore non descendet cum honore‘ (chi chi nu va insü tremblond da respet, nu tuorna ingiò in onur). 

Aint il cor a schnestra dà in ögl il tabernacul mürà chi datescha dal temp amo avant la refuorma. La curuna in stil dal renaschimaint muossa üna rapreschantaziun da la Soncha Tschaina. Dasper Gesu dan in ögl Joannes, il scolar predilet, sco eir Judas Ischariot cun buorsa e dainta cruschada. Incurunà vain il tabernacul da Cristus resüstà, flancà da duos anguels chi tegnan in man utensils da la paschiun. Las plattas sepulcralas lovadas aint il fuond dateschan dal 17 fin 19avel tschientiner.